INALMAHAN ng Philippine Navy at ng Philippine Marine Corps ang muling pagdawit sa militar sa umano’y pagkawala ni Orly Regala Guteza, ang sinasabing “surprise witness” sa multibillion peso flood control scandal, kasabay ng patuloy na malawakang protesta sa bansa.
Ayon kay Navy Spokesperson Capt. Marissa Martinez, walang katotohanan ang pinalalabas na nasa kustodiya ng Navy o ng Marine Corps si Guteza, na matagal nang nagretiro sa serbisyo.
“To those who continue to fabricate stories and weaponize misinformation at the expense of the AFP, we respectfully appeal: please spare the Navy and the Armed Forces of the Philippines. We have nothing to hide and nothing to protect except the truth,” ani Martinez.
Binigyang-diin ng Navy na agad silang nagsagawa ng beripikasyon, inspection, at intelligence validation matapos makarating sa kanilang hanay ang muling pag-uugnay sa kanila sa pagkawala ng testigo. Lumitaw umano sa lahat ng pagsusuri na hindi nila hawak si Guteza o ang pamilya nito.
“The Philippine Navy strongly asserts that claims regarding the custody, protection, or safekeeping of Mr. Orly Regala Guteza and his family by the Navy, particularly the Philippine Marine Corps, are unfounded, unsupported by evidence, and have no basis in fact,” pahayag ni Martinez.
Ayon pa sa opisyal, ang pag-uugnay sa militar ay malinaw na ispekulasyon at isang uri ng disinformation na maaaring magdulot ng pagkakawatak-watak at kaguluhan.
Hindi rin umano kailanman kakanlungin o itatago ng Navy ang sinoman na hinahanap ng batas. “It is contrary to our core values, our oath of service, and the sacrifices made by generations of sailors and Marines who have served this nation with honor,” ani Martinez.
(VERLIN RUIZ)
88 
